Аб адкрыцці ў Нацыянальным музеі Амана выстаўкі «Кніжная культура беларускіх татар»
09.09.2026 г.9 верасня 2026 года ў Нацыянальным музеі Султаната Аман адкрылася выстаўка «Кніжная культура беларускіх татар», падрыхтаваная сумесна з Нацыянальнай бібліятэкай Беларусі. Выстаўку адкрылі Міністр вакуфаў і рэлігійных спраў Амана Я.В. Мухамед бін Саід бін Хальфан аль-Маамары, генеральны сакратар Нацыянальнага музея Амана Я.В. Джамаль аль-Мусаві і генеральны дырэктар Нацыянальнай бібліятэкі Беларусі Я.В. Вадзім Гігін.
На выстаўцы прадстаўлены рэдкія помнікі рукапіснай спадчыны беларускіх татар канца XVIII – пачатку XX стагоддзя: рукапісы Карана, тафсіры, кітабы, хамаілы, а таксама тэксты медыцынскага і навучальнага характару. Створаныя на арабскай, беларускай, польскай і цюркскай мовах з выкарыстаннем арабскай графікі, яны адлюстроўваюць самабытную культуру беларускіх татар, якія на працягу стагоддзяў захоўвалі сваю веру і традыцыі, з’яўляючыся неад’емнай часткай беларускага грамадства. Экспазіцыя будзе прадстаўлена ў Амане да 6 лістапада 2026 года.
Выступаючы на адкрыцці выстаўкі, В. Гігін адзначыў асаблівую гістарычную каштоўнасць гэтай спадчыны і значэнне выстаўкі для ўмацавання сувязяў паміж Беларуссю і Аманам. Прадстаўніца Нацыянальнай бібліятэкі Беларусі Крысціна Ярмак выступіла з тэматычнай лекцыяй аб гісторыі экспанатаў.
Супрацоўніцтва беларускіх і аманскіх устаноў таксама прадугледжвае праграму прафесійнага абмену і навучання беларускіх рэстаўратараў пры садзейнічанні Нацыянальнага музея і Нацыянальнага ўпраўлення дакументацыі і архіваў Амана.
